Desizyon Panèl Enspeksyon sou Plent Kominote an Ayiti yo te depoze a (Fevriye 2015) [KR]

Memorandòm pou direktè egzektif Asosyasyon Devlopman Entènasyonal yo

Avi sou non-anrejistreman ak obsèvasyon sou kad estratejik ki aplikab pou asistans teknik

Konfòmeman ak paragraf 17 Rezolisyon ki te mete Panèl Enspeksyon an sou pye, m ap fè nou konnen Panèl Enspeksyon an ("Panèl la") te resevwa yon "Demande d’inspection de l’Assistance technique au dialogue minier en Haïti" (Demann pou Enspeksyon Asistans Teknik Dyalòg sou Eksplwatasyon Minyè an Ayiti) (P144931), ki te jwenn sipò Bank Mondyal la atravè yon fon fidisyè Mekanis Konsiltatif Teknik pou Endistri Ekstraksyon (EI-TAF). N ap enkli Demann pou Enspeksyon an kòm Fichye 1 Memorandòm sa a.

Demann nan te fèt pa Kolektif Jistis Min an Ayiti, yon kolektif òganizasyon sosyete sivil ayisyen, ki gen sikònskripsyon nasyonal ak lokal, ansanm avèk kominote ki deklare yo te sibi, epi yo kontinye ap sibi, konsekans devlopman ak refòm sektè minyè an Ayiti.

Moun k ap fè demann nan konsidere sipò Bank lan pou refòm nan sektè minyè an Ayiti "pral gen pou rezilta gwo dega sou sosyete ak anviwònman an, ki gen ladan li polisyon rivyè enpòtan, enpak sou sektè agrikòl la, ak deplasman envolontè kominote yo." Yo deklare Bank lan pa t suiv Politik Sòvgad Sosyal ak Anviwònmantal nan operasyon sa a, ki gen ladan l: "asistans avèk nouvo pwojè lwa sou eksplwatasyon minyè; ranfòsman kapasite Biwo Min ak Enèji; asistans avèk devlopman yon kadas minyè; sipò pou angajman moun ki konsène yo; ak lòt aktivite ki gen pou wè ak devlopman sektè minyè a." Moun k ap fè demann nan mande Panèl la kenbe anèks yo konfidansyèl.